Albert Mühldorfers Gedichtband kreist um das Thema Liebe – knapp, pointiert, mit viel schwarzem Humor. Bei seinen Mundart-Texten geht es dem Autor nicht um die Konservierung des Dialektes, sondern er will in der oberpfälzer Alltagssprache den Leuten möglichst genau "aufs Maul" schauen. Er ist ein scharfsinniger Beobachter seiner Mitmenschen und Umwelt.
Albert Mühldorfer, geboren 1952, lebt in Obertraubling bei Regensburg und ist in der Lehrerbildung tätig. Im lichtung verlag ist 2002 bereits der Gedichtband Ganz schee daschrogga erschienen.
TEE ODER KAFFEE
mach ma r uns
an tee oder an kaffee?
was d magst
was magst n du?
mir is s gleich
sag halt, was d magst!
i mag, was du magst
i mag a antwort
aaf was?
aaf was e gfragt hab
wann?
grad
was hast n grad gfragt?
was d dringa magst
irgndwas
sag halt was!
a kakao waar amol ned schlecht
hamma leider ned dahoam
na mach ma r uns halt
an tee oder an kaffee
TRAUERFALL
laaft ma doch ned
mei exfrau übern weg
ganz in schwoaz, vastehst
mei mo, sagt s
bumperlgsund war a
fallt um _ dood _ vastehst
siehgst as, deng e ma
had da d scheidung
s lebn grett, vastehst
DAHOAM BIN E
dahoam bin e
wo ma s bett gmacht wird
und in da friah
da kaffee hoaß aaf m tisch steht
dahoam bin e
wo ma da aschnbecher ausgleert wird
und aaf d nacht
a boa flaschln bier im kühlschrank liegn
dahoam bin e
wo s is, wia r e s mag
wo s laaft, wia r e moan
wo doa wird, was e wüill
dahoam bin e
bei dir
du kennst me
und magst me trotzdem
HALLNBAD
fahr halt in d stood
s hallnbad häd grad no off
schwimmst a dreiviertl stund
des gangert no schee
a guade idee
scho sitz e im wagn
und an parkplatz findd e aa
direkt vorm tabakladn
steig aus
denk ma, a kistl zigarrn duad s aa
geh eine, kaaf s
und fahr wieder hoam
